ಹಾವೇರಿ ಹೆಗ್ಗೆರೆ ಕೆರೆಯ ಪರಿಸರದಲ್ಲಿ ಅನಾರೋಗ್ಯಕ್ಕೆ ತುತ್ತಾಗುವ ಮುನ್ನ ಮಾಲತೇಶ ಅಂಗೂರ ಸೆರೆ ಹಿಡಿದ ಛಾಯಾಚಿತ್ರಗಳು.
ಚಳಿಗಾಲವನ್ನೇ ಕಸಿದುಕೊಂಡಿತೇ ಎಲ್‌ನಿನೋ?ಮಾಯವಾದ ಚಳಿ; ಹೆಚ್ಚಾದ ಬಿಸಿ!
ಹವಾಮಾನ ವೈಪರೀತ್ಯಕ್ಕೆ ಋತುಚಕ್ರದಲ್ಲಿ ಏರುಪೇರು; ವಲಸೆ ಹಕ್ಕಿಗಳ ಆಗಮನಕ್ಕೂ ಕುತ್ತು ? ಕೆರೆಗಳಲ್ಲಿ ಪಕ್ಷಿಗಳ ಕಲರವ ಕ್ಷೀಣ
ಹಾವೇರಿ: ಚಳಿಗಾಲ ಎಂದರೆ ಯಾರಿಗೆ ತಾನೆ ಇಷ್ಟವಿಲ್ಲ ಹೇಳಿ! ಮೈ ಕೊರೆಯುವ ಚಳಿ, ಮುಂಜಾನೆಯ ಇಬ್ಬನಿ, ಮಂಜಿನ ಮುಸುಕು, ಬೆಚ್ಚಗಿನ ಉಡುಪು, ಬಿಸಿ ಬಿಸಿ ಚಹಾ… ಇವೆಲ್ಲ ಚಳಿಗಾಲದ ಅವಿಭಾಜ್ಯ ಅಂಗಗಳು. ಆದರೆ, ಪ್ರಸಕ್ತ ವರ್ಷ ಚಳಿಗಾಲದ ಸ್ವರೂಪವೇ ಬದಲಾಗಿದೆ.ಚಳಿ ಬರಬೇಕಾದ ಸಮಯದಲ್ಲಿ ಬಿಸಿಲಿನ ತಾಪ ಹೆಚ್ಚಾಗುತ್ತಿದೆ. ಮೈ ನಡುಗಿಸಬೇಕಾದ ಚಳಿಗಾಲದಲ್ಲಿ ಸೆಖೆಯ ಅನುಭವವಾಗುತ್ತಿದೆ. ಪ್ರಕೃತಿಯ ಋತುಚಕ್ರದಲ್ಲಿ ಉಂಟಾಗುತ್ತಿರುವ ಈ ಏರುಪೇರು ಪರಿಸರ ವ್ಯವಸ್ಥೆಯ ಮೇಲೆ ವ್ಯತಿರಿಕ್ತ ಪರಿಣಾಮವನ್ನು ಉಂಟುಮಾಡುತ್ತಿದೆ.
ಸಾಮಾನ್ಯವಾಗಿ ನವೆಂಬರ್‌ನಿಂದ ಆರಂಭವಾಗುವ ಚಳಿಗಾಲ ಫೆಬ್ರವರಿವರೆಗೆ ಮುಂದುವರಿಯುತ್ತದೆ. ಡಿಸೆಂಬರ್ ಮತ್ತು ಜನವರಿಯಲ್ಲಿ ಚಳಿಯ ತೀವ್ರತೆ ಹೆಚ್ಚಾಗುತ್ತದೆ. ಮುಂಜಾನೆ ದಟ್ಟ ಮಂಜು, ಮೈ ಕೊರೆಯುವ ಶೀತಗಾಳಿ, ಮೈ ಮುದುಡಿಕೊಂಡು ಓಡಾಡುವ ಜನರು ಚಳಿಗಾಲದ ಸಾಮಾನ್ಯ ದೃಶ್ಯಗಳಾಗಿದ್ದವು. ಆದರೆ, ಈ ಬಾರಿ ಚಳಿಗಾಲದ ಆರಂಭದಲ್ಲಿಯೇ ಬೇಸಿಗೆಯ ಅನುಭವವಾಗುತ್ತಿರುವುದು ಹವಾಮಾನದಲ್ಲಿನ ಬದಲಾವಣೆಗೆ ಸಾಕ್ಷಿಯಾಗಿದೆ.
ಮಕ್ಕಳು, ವೃದ್ಧರು ಮಾತ್ರವಲ್ಲದೆ ಎಲ್ಲ ವಯೋಮಾನದವರೂ ಸ್ವೆಟರ್, ಜಾಕೆಟ್, ಮಫ್ಲರ್, ಮಂಕಿ ಕ್ಯಾಪ್ ಧರಿಸಿ ಓಡಾಡುವ ದೃಶ್ಯಗಳು ಕಾಣುತ್ತಿಲ್ಲ. ಬೆಳಗಿನ ಜಾವ ಬಿಸಿ ಚಹಾಕ್ಕಾಗಿ ಹುಡುಕಾಟ, ರಸ್ತೆ ಬದಿಯಲ್ಲಿ ಬೆಂಕಿ ಕಾಯಿಸಿಕೊಳ್ಳುವ ಜನರ ದೃಶ್ಯಗಳೂ ವಿರಳವಾಗಿವೆ. ಚಳಿಗಾಲದ ಸಂಭ್ರಮವೇ ಕಣ್ಮರೆಯಾಗುತ್ತಿರುವ ಅನುಭವವಾಗುತ್ತಿದೆ.
ಎಲ್‌ನಿನೋ ಪ್ರಭಾವ ಕಾರಣವೇ?:ಜಾಗತಿಕ ತಾಪಮಾನ ಏರಿಕೆ (ಉಟobಚಿಟ Wಚಿಡಿmiಟಿg), ಹವಾಮಾನ ಬದಲಾವಣೆ (ಅಟimಚಿಣe ಅhಚಿಟಿge), ಎಲ್‌ನಿನೋ (ಇಟ ಓio) ಸೇರಿದಂತೆ ಹಲವು ಹವಾಮಾನ ವಿದ್ಯಮಾನಗಳು ಋತುಮಾನದ ಮೇಲೆ ಪರಿಣಾಮ ಬೀರುತ್ತಿವೆ.
ಪೆಸಿಫಿಕ್ ಮಹಾಸಾಗರದ ಸಮಭಾಜಕ ಪ್ರದೇಶದಲ್ಲಿ ಸಮುದ್ರದ ಮೇಲ್ಮೈ ತಾಪಮಾನ ಸಾಮಾನ್ಯಕ್ಕಿಂತ ಹೆಚ್ಚಾಗುವ ವಿದ್ಯಮಾನವೇ ಎಲ್‌ನಿನೋ. ಇದು ಜಾಗತಿಕ ಹವಾಮಾನ ವ್ಯವಸ್ಥೆಯಲ್ಲಿ ಬದಲಾವಣೆ ಉಂಟುಮಾಡುತ್ತದೆ. ಭಾರತದ ಮುಂಗಾರು ಮಳೆ, ತಾಪಮಾನ ಮತ್ತು ಗಾಳಿಯ ಚಲನೆಯ ಮೇಲೂ ಇದರ ಪರೋಕ್ಷ ಪರಿಣಾಮ ಉಂಟಾಗಬಹುದು.
ಅದೇ ರೀತಿ, ಮೆಡಿಟರೇನಿಯನ್ ಪ್ರದೇಶದಿಂದ ಭಾರತಕ್ಕೆ ಆಗಮಿಸುವ ಪಶ್ಚಿಮದ ಅಡಚಣೆಗಳು (Wesಣeಡಿಟಿ ಆisಣuಡಿbಚಿಟಿಛಿes) ಉತ್ತರ ಭಾರತದ ಚಳಿಗಾಲದ ಹವಾಮಾನವನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಹಿಮಾಲಯ ಪ್ರದೇಶದಲ್ಲಿ ಹಿಮಪಾತ, ಉತ್ತರ ಭಾರತದಲ್ಲಿ ಶೀತಗಾಳಿ ಹಾಗೂ ತಾಪಮಾನದ ಏರಿಳಿತಗಳಿಗೆ ಇವು ಕಾರಣವಾಗುತ್ತವೆ. ಇವುಗಳ ಚಟುವಟಿಕೆ ದುರ್ಬಲಗೊಂಡಾಗ ಚಳಿಯ ಸ್ವರೂಪವೂ ಬದಲಾಗಬಹುದು.
ಮತ್ತೊಂದೆಡೆ, ವಾಹನಗಳು, ಕೈಗಾರಿಕೆಗಳು ಮತ್ತು ಇಂಧನ ಬಳಕೆಯಿಂದ ಹೊರಹೊಮ್ಮುವ ಹಸಿರುಮನೆ ಅನಿಲಗಳು ವಾತಾವರಣದಲ್ಲಿ ಉಷ್ಣತೆಯನ್ನು ಹಿಡಿದಿಡುತ್ತವೆ. ಇದರ ಪರಿಣಾಮವಾಗಿ ಜಾಗತಿಕ ತಾಪಮಾನ ಏರಿಕೆಯಾಗುತ್ತಿದೆ. ಹಗಲಿನ ಉಷ್ಣಾಂಶ ಮಾತ್ರವಲ್ಲದೆ, ರಾತ್ರಿ ವೇಳೆಯ ಕನಿಷ್ಠ ತಾಪಮಾನವೂ ಹೆಚ್ಚಾಗುವ ಸಾಧ್ಯತೆ ಇದೆ.
ಹೀಗಾಗಿ ಚಳಿಗಾಲದ ತೀವ್ರತೆ ಕಡಿಮೆಯಾಗುತ್ತಿರುವುದನ್ನು ಒಂದೇ ಕಾರಣಕ್ಕೆ ಸಮೀಕರಿಸಲಾಗದು. ಸ್ಥಳೀಯ ಹವಾಮಾನ ಪರಿಸ್ಥಿತಿ, ಗಾಳಿಯ ದಿಕ್ಕು, ಮೋಡಗಳ ಚಲನೆ, ಮಳೆ ಹಾಗೂ ಜಾಗತಿಕ ಹವಾಮಾನ ವಿದ್ಯಮಾನಗಳ ಒಟ್ಟಾರೆ ಪರಿಣಾಮವನ್ನು ಪರಿಗಣಿಸಬೇಕಾಗುತ್ತದೆ.
ಚಳಿಗಾಲದಲ್ಲೂ ಮೋಡ, ತುಂತುರು ಮಳೆ!:ಸಾಮಾನ್ಯವಾಗಿ ಕರ್ನಾಟಕದ ಉತ್ತರ ಒಳನಾಡಿನ ಜಿಲ್ಲೆಗಳಾದ ಬೆಳಗಾವಿ, ಬೀದರ್, ವಿಜಯಪುರ, ಕಲಬುರಗಿ, ರಾಯಚೂರು, ಬಳ್ಳಾರಿ, ಹಾವೇರಿ ಸೇರಿದಂತೆ ಹಲವು ಜಿಲ್ಲೆಗಳಲ್ಲಿ ಚಳಿಗಾಲದ ಅವಧಿಯಲ್ಲಿ ತಾಪಮಾನ ಗಣನೀಯವಾಗಿ ಇಳಿಕೆಯಾಗುತ್ತದೆ. ಕೆಲವು ವರ್ಷಗಳಲ್ಲಿ ಕನಿಷ್ಠ ತಾಪಮಾನ ೧೦ ಡಿಗ್ರಿ ಸೆಲ್ಸಿಯಸ್‌ಗಿಂತಲೂ ಕೆಳಕ್ಕೆ ಕುಸಿದ ಉದಾಹರಣೆಗಳಿವೆ.ಆದರೆ, ಈ ಬಾರಿ ಮೋಡ ಕವಿದ ವಾತಾವರಣ, ಗಾಳಿಯ ದಿಕ್ಕಿನ ಬದಲಾವಣೆ ಹಾಗೂ ಅಲ್ಲಲ್ಲಿ ತುಂತುರು ಮಳೆಯಂತಹ ವಿದ್ಯಮಾನಗಳು ಚಳಿಯ ಅನುಭವವನ್ನು ಬದಲಾಯಿಸಿವೆ. ಹಗಲಿನ ವೇಳೆ ಬಿಸಿಲಿನ ತಾಪ ಹೆಚ್ಚಾಗುತ್ತಿರುವುದು ಜನರ ಅನುಭವಕ್ಕೂ ಬರುತ್ತಿದೆ.
ಚಳಿಗಾಲದಲ್ಲಿ ಮುಂಜಾನೆ ದಟ್ಟ ಮಂಜು ಆವರಿಸಿ ವಾಹನಗಳ ಸಂಚಾರಕ್ಕೂ ಅಡ್ಡಿಯಾಗುತ್ತಿತ್ತು. ಕೆಲವೊಮ್ಮೆ ವಿಮಾನಗಳ ಹಾರಾಟಕ್ಕೂ ತೊಂದರೆಯಾಗುತ್ತಿತ್ತು. ಆದರೆ, ಈ ಬಾರಿ ಅಂತಹ ವಾತಾವರಣ ಎಲ್ಲೆಡೆ ಕಂಡುಬರುತ್ತಿಲ್ಲ. ಇದರ ಪರಿಣಾಮ ಕೃಷಿ ಚಟುವಟಿಕೆಗಳ ಮೇಲೂ ಆತಂಕ ಎದುರಾಗಿದೆ. ಕೊಯ್ಲಿನ ಹಂತದಲ್ಲಿರುವ ಬೆಳೆಗಳಿಗೆ ಅಕಾಲಿಕ ಮಳೆ ಎದುರಾದರೆ ರೈತರಿಗೆ ನಷ್ಟ ಉಂಟಾಗುವ ಸಾಧ್ಯತೆ ಇದೆ.
ಪಕ್ಷಿ ಸಂಕುಲಕ್ಕೆ ಎದುರಾಗುತ್ತಿದೆಯೇ ಗಂಡಾಂತರ?:ಚಳಿಗಾಲದ ಹವಾಮಾನ ವೈಪರೀತ್ಯದ ಪರಿಣಾಮ ಕೇವಲ ಮನುಷ್ಯರ ಬದುಕಿಗೆ ಸೀಮಿತವಾಗಿಲ್ಲ. ಪ್ರಕೃತಿಯ ಜೀವವೈವಿಧ್ಯದ ಪ್ರಮುಖ ಭಾಗವಾಗಿರುವ ಪಕ್ಷಿ ಸಂಕುಲದ ಮೇಲೂ ಗಂಭೀರ ಪರಿಣಾಮ ಬೀರುವ ಆತಂಕವಿದೆ. ಪ್ರತಿ ವರ್ಷ ಚಳಿಗಾಲ ಆರಂಭವಾಗುತ್ತಿದ್ದಂತೆ ಸೈಬೀರಿಯಾ, ಮಂಗೋಲಿಯಾ, ಚೀನಾ ಸೇರಿದಂತೆ ವಿವಿಧ ದೇಶಗಳ ಶೀತ ಪ್ರದೇಶಗಳಿಂದ ಸಾವಿರಾರು ಕಿಲೋಮೀಟರ್ ದೂರ ಕ್ರಮಿಸಿ ವಲಸೆ ಹಕ್ಕಿಗಳು ಭಾರತಕ್ಕೆ ಆಗಮಿಸುತ್ತವೆ. ಆಹಾರ, ಅನುಕೂಲಕರ ಹವಾಮಾನ ಮತ್ತು ಸಂತಾನೋತ್ಪತ್ತಿಗೆ ಪೂರಕವಾದ ವಾತಾವರಣದ ಹುಡುಕಾಟದಲ್ಲಿ ಇವು ವಲಸೆ ಬರುತ್ತವೆ.ಆದರೆ, ಹವಾಮಾನ ಚಕ್ರದಲ್ಲಿ ಉಂಟಾಗುವ ಏರುಪೇರು ಅವುಗಳ ವಲಸೆ ಪ್ರಯಾಣವನ್ನೇ ಅಸ್ತವ್ಯಸ್ತಗೊಳಿಸಬಹುದು.
ವಲಸೆಯ ಸಮಯದಲ್ಲಿ ಬದಲಾವಣೆ: ತಾಪಮಾನ ಮತ್ತು ಗಾಳಿಯ ಚಲನೆಯಲ್ಲಿನ ಬದಲಾವಣೆಗಳಿಂದ ಪಕ್ಷಿಗಳ ವಲಸೆ ಆರಂಭಿಸುವ ಹಾಗೂ ತಲುಪುವ ಸಮಯದಲ್ಲಿ ವ್ಯತ್ಯಾಸ ಉಂಟಾಗಬಹುದು. ಇದರಿಂದ ಅವುಗಳಿಗೆ ಸೂಕ್ತ ಆಹಾರ ಮತ್ತು ವಾಸಸ್ಥಾನ ದೊರೆಯುವುದು ಕಷ್ಟವಾಗಬಹುದು.
ಆಹಾರದ ಅಭಾವ: ಹವಾಮಾನ ಬದಲಾವಣೆಯಿಂದ ಕೀಟಗಳ ಉತ್ಪತ್ತಿ, ಸಸ್ಯಗಳ ಬೆಳವಣಿಗೆ, ಹೂ ಬಿಡುವ ಕಾಲ ಹಾಗೂ ಜಲಚರಗಳ ಲಭ್ಯತೆಯಲ್ಲಿ ವ್ಯತ್ಯಾಸವಾಗಬಹುದು. ಪಕ್ಷಿಗಳು ವಲಸೆ ಬರುವ ವೇಳೆಗೆ ಅವುಗಳಿಗೆ ಅಗತ್ಯವಾದ ಆಹಾರ ದೊರೆಯದಿದ್ದರೆ ಬದುಕು ಕಷ್ಟವಾಗುತ್ತದೆ.
ಜಲಮೂಲಗಳ ಒಣಗುವಿಕೆ: ಕೆರೆ, ಕಟ್ಟೆ, ನದಿ ಮತ್ತು ಜೌಗು ಪ್ರದೇಶಗಳು ವಲಸೆ ಹಕ್ಕಿಗಳ ಪ್ರಮುಖ ಆಶ್ರಯ ತಾಣಗಳು. ತಾಪಮಾನ ಏರಿಕೆ ಮತ್ತು ಮಳೆಯ ಏರುಪೇರುಗಳಿಂದ ಜಲಮೂಲಗಳ ನೀರಿನ ಮಟ್ಟ ಕುಸಿದರೆ ಪಕ್ಷಿಗಳ ವಾಸಸ್ಥಾನಕ್ಕೆ ಧಕ್ಕೆಯಾಗುತ್ತದೆ.
ಸಂತಾನೋತ್ಪತ್ತಿಗೆ ಅಡ್ಡಿ: ಸೂಕ್ತ ಹವಾಮಾನ ಮತ್ತು ಆಹಾರದ ಲಭ್ಯತೆಯಲ್ಲಿ ವ್ಯತ್ಯಾಸ ಉಂಟಾದರೆ ಪಕ್ಷಿಗಳ ಸಂತಾನೋತ್ಪತ್ತಿಯ ಕಾಲಚಕ್ರವೂ ಬದಲಾಗಬಹುದು. ಇದರಿಂದ ಮೊಟ್ಟೆ, ಮರಿಗಳ ಬೆಳವಣಿಗೆ ಮತ್ತು ಅವುಗಳ ಬದುಕುಳಿಯುವಿಕೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.
ಹಾವೇರಿಯ ಕೆರೆಗಳಲ್ಲಿ ಪಕ್ಷಿಗಳ ಕಲರವ ಎಲ್ಲಿ?
ಹಾವೇರಿ ಜಿಲ್ಲೆ ಕೂಡ ವಲಸೆ ಹಕ್ಕಿಗಳಿಗೆ ಆಶ್ರಯ ನೀಡುವ ಹಲವು ಕೆರೆಗಳನ್ನು ಹೊಂದಿದೆ. ಹಾವೇರಿ ನಗರದ ಹೆಗ್ಗೆರೆ ಕೆರೆ, ಗುತ್ತಲ ಸಮೀಪದ ದೊಡ್ಡ ಕೆರೆ ಹಾಗೂ ರಾಣೇಬೆನ್ನೂರು ತಾಲೂಕಿನ ವಿವಿಧ ಕೆರೆಗಳು ಪಕ್ಷಿಗಳ ವಾಸಸ್ಥಾನಗಳಾಗಿವೆ. ಪ್ರತಿ ವರ್ಷ ಚಳಿಗಾಲದಲ್ಲಿ ಈ ಕೆರೆಗಳ ಸುತ್ತಲೂ ವಿವಿಧ ಜಾತಿಯ ಪಕ್ಷಿಗಳ ಕಲರವ ಕೇಳಿಬರುತ್ತಿತ್ತು. ನೀರಿನಲ್ಲಿ ತೇಲಾಡುವ ಜಲಪಕ್ಷಿಗಳು, ಆಹಾರ ಅರಸುವ ಹಕ್ಕಿಗಳು, ಮರಗಳ ಮೇಲೆ ಸಾಲಾಗಿ ಕುಳಿತುಕೊಳ್ಳುವ ವಲಸೆ ಪಕ್ಷಿಗಳು ಪ್ರಕೃತಿಯ ಸೌಂದರ್ಯವನ್ನು ಹೆಚ್ಚಿಸುತ್ತಿದ್ದವು.
ಆದರೆ, ಪ್ರಸಕ್ತ ಋತುವಿನಲ್ಲಿ ಕೆಲವು ಕೆರೆಗಳಲ್ಲಿ ನಿರೀಕ್ಷಿತ ಪ್ರಮಾಣದಲ್ಲಿ ವಲಸೆ ಪಕ್ಷಿಗಳು ಕಾಣಿಸದಿರುವುದು ಗಮನ ಸೆಳೆದಿದೆ. ಇದು ಹವಾಮಾನ ಬದಲಾವಣೆಯ ಪರಿಣಾಮವೇ ಅಥವಾ ಆಹಾರ, ನೀರಿನ ಲಭ್ಯತೆ, ಕೆರೆಗಳ ಪರಿಸರ ವ್ಯವಸ್ಥೆಯಲ್ಲಿನ ಬದಲಾವಣೆಗಳ ಪರಿಣಾಮವೇ ಎಂಬುದನ್ನು ಅಧ್ಯಯನ ಮಾಡಬೇಕಿದೆ.
ಪಕ್ಷಿಗಳು ಒಂದು ಪ್ರದೇಶಕ್ಕೆ ಬರುವುದನ್ನು ನಿಲ್ಲಿಸಿದರೆ ಅಥವಾ ಅವುಗಳ ಸಂಖ್ಯೆ ಗಣನೀಯವಾಗಿ ಕಡಿಮೆಯಾದರೆ ಅದರ ಹಿಂದೆ ಹಲವು ಪರಿಸರಾತ್ಮಕ ಕಾರಣಗಳಿರಬಹುದು. ಹೀಗಾಗಿ ಪಕ್ಷಿಗಳ ಆಗಮನ, ಅವುಗಳ ಸಂಖ್ಯೆ, ವಾಸಸ್ಥಾನ ಮತ್ತು ಆಹಾರದ ಲಭ್ಯತೆ ಕುರಿತು ಪಕ್ಷಿ ತಜ್ಞರು ಹಾಗೂ ಪರಿಸರ ಅಧ್ಯಯನಕಾರರು ನಿರಂತರವಾಗಿ ಗಮನಹರಿಸುವ ಅಗತ್ಯವಿದೆ.
ಋತುಚಕ್ರದ ಏರುಪೇರು; ಎಚ್ಚೆತ್ತುಕೊಳ್ಳದಿದ್ದರೆ ಅಪಾಯ!
ಪ್ರಕೃತಿಯಲ್ಲಿ ಪ್ರತಿಯೊಂದು ಋತುವಿಗೂ ತನ್ನದೇ ಆದ ಮಹತ್ವವಿದೆ. ಮಳೆಗಾಲ, ಚಳಿಗಾಲ, ಬೇಸಿಗೆ ಇವೆಲ್ಲವೂ ಜೀವಸಂಕುಲದ ಬದುಕಿನೊಂದಿಗೆ ಬೆಸೆದುಕೊಂಡಿವೆ. ಒಂದೊಂದು ಋತುವಿನಲ್ಲಾಗುವ ಬದಲಾವಣೆ ಮತ್ತೊಂದು ಋತುವಿನ ಮೇಲೂ ಪರಿಣಾಮ ಬೀರುತ್ತದೆ. ಚಳಿಗಾಲದಲ್ಲಿ ಚಳಿ ಕಡಿಮೆಯಾಗುವುದು ಕೇವಲ ಸ್ವೆಟರ್, ಜಾಕೆಟ್‌ಗಳ ಬಳಕೆ ಕಡಿಮೆಯಾಗುವ ಸಂಗತಿಯಲ್ಲ. ಅದು ಪ್ರಕೃತಿಯ ಸಮತೋಲನದಲ್ಲಿ ಉಂಟಾಗುತ್ತಿರುವ ಬದಲಾವಣೆಯ ಮುನ್ಸೂಚನೆಯೂ ಆಗಿರಬಹುದು. ಮನುಷ್ಯನ ಅಭಿವೃದ್ಧಿಯ ಹೆಸರಿನಲ್ಲಿ ಅರಣ್ಯ ನಾಶ, ಜಲಮೂಲಗಳ ಒತ್ತುವರಿ, ಹೆಚ್ಚುತ್ತಿರುವ ವಾಹನಗಳ ಸಂಖ್ಯೆ, ಕೈಗಾರಿಕಾ ಮಾಲಿನ್ಯ ಮತ್ತು ಹಸಿರು ಪ್ರದೇಶಗಳ ನಾಶಕ್ಕೆ ಕಡಿವಾಣ ಹಾಕದಿದ್ದರೆ ಪರಿಸರದ ಮೇಲಿನ ಒತ್ತಡ ಮತ್ತಷ್ಟು ಹೆಚ್ಚಲಿದೆ.
ಕೆರೆಗಳ ಸಂರಕ್ಷಣೆ, ಗಿಡಮರಗಳ ಬೆಳೆಸುವಿಕೆ, ಅರಣ್ಯ ಪ್ರದೇಶಗಳ ರಕ್ಷಣೆ, ಮಾಲಿನ್ಯ ನಿಯಂತ್ರಣ ಹಾಗೂ ಪಕ್ಷಿಗಳಿಗೆ ಅನುಕೂಲಕರವಾದ ವಾಸಸ್ಥಾನಗಳ ನಿರ್ಮಾಣಕ್ಕೆ ಆದ್ಯತೆ ನೀಡಬೇಕಿದೆ.
ಚಳಿಗಾಲ ಎಂದರೆ ಕೇವಲ ಮೈ ನಡುಗಿಸುವ ಚಳಿಯಲ್ಲ; ಅದು ಪ್ರಕೃತಿಯ ಜೀವಚಕ್ರದ ಒಂದು ಅವಿಭಾಜ್ಯ ಭಾಗ. ಆ ಚಳಿಯನ್ನೇ ಪ್ರಕೃತಿ ಕಳೆದುಕೊಳ್ಳುತ್ತಿದ್ದರೆ, ಅದರ ಪರಿಣಾಮ ಮನುಷ್ಯನಿಂದ ಹಿಡಿದು ಪಕ್ಷಿ ಸಂಕುಲದವರೆಗೆ ಎಲ್ಲ ಜೀವಿಗಳ ಬದುಕಿನ ಮೇಲೂ ಬೀಳಲಿದೆ.ಇಂದು ಮಾಯವಾಗುತ್ತಿರುವುದು ಕೇವಲ ಚಳಿಯಲ್ಲ; ಪ್ರಕೃತಿಯ ಸಹಜ ಲಯವೇ ಏರುಪೇರಾಗುತ್ತಿರುವ ಆತಂಕಕಾರಿ ಬೆಳವಣಿಗೆ. ಋತುಮಾನಗಳ ಸಹಜತೆಯನ್ನು ಉಳಿಸಿಕೊಳ್ಳದಿದ್ದರೆ ಮುಂದಿನ ಪೀಳಿಗೆಗೆ ಚಳಿಗಾಲದ ಅನುಭವವನ್ನೂ ಪುಸ್ತಕಗಳಲ್ಲಿ ಓದಿ ತಿಳಿಯಬೇಕಾದ ಪರಿಸ್ಥಿತಿ ಎದುರಾದೀತೇ?
ಹಾವೇರಿ ಹೆಗ್ಗೆರೆ ಕೆರೆಯಲ್ಲಿ ವಿದೇಶಿ ಅತಿಥಿಗಳಿಲ್ಲ!
ಹಾವೇರಿ ನಗರದ ಐತಿಹಾಸಿಕ ಹೆಗ್ಗೆರೆ ಕೆರೆ ಕೇವಲ ಸ್ಥಳೀಯ ಪಕ್ಷಿಗಳ ಆಶ್ರಯ ತಾಣವಲ್ಲ, ದೂರದ ದೇಶಗಳಿಂದ ಸಾವಿರಾರು ಕಿಲೋಮೀಟರ್‌ಗಳ ಪ್ರಯಾಣ ಬೆಳೆಸಿ ಬರುವ ವಲಸೆ ಹಕ್ಕಿಗಳಿಗೂ ನೆಚ್ಚಿನ ತಾಣವಾಗಿದೆ. ಆಸ್ಟ್ರೇಲಿಯಾದಿಂದ ಪಟ್ಟೆತಲೆ ಹೆಬ್ಬಾತುಗಳು, ಕ್ರೌಂಚ ಪಕ್ಷಿಗಳು, ಸ್ಯಾಂಡ್‌ಗ್ರೌಸ್, ಸ್ಪೂನ್‌ಬಿಲ್ ಸೇರಿದಂತೆ ಹಲವು ಬಗೆಯ ಪಕ್ಷಿಗಳು ಈ ಕೆರೆಗೆ ವಲಸೆ ಬರುತ್ತವೆ.
ಇನ್ನೊಂದು ವಿಶೇಷವೆಂದರೆ, ಗುಜರಾತ್‌ನ ಕಚ್ ಪ್ರದೇಶದಿಂದ ರಾಜಹಂಸಗಳು ಕೂಡ ಹೆಗ್ಗೆರೆ ಕೆರೆಗೆ ಆಗಮಿಸಿರುವುದನ್ನು ವನ್ಯಜೀವಿ ಛಾಯಾಗ್ರಾಹಕರು ತಮ್ಮ ಕ್ಯಾಮೆರಾದಲ್ಲಿ ದಾಖಲಿಸಿದ್ದಾರೆ. ಸಾವಿರಾರು ಕಿಲೋಮೀಟರ್ ದೂರ ಕ್ರಮಿಸಿ ಬರುವ ಈ ಪಕ್ಷಿಗಳು ಹೆಗ್ಗೆರೆ ಕೆರೆಯ ಜೀವವೈವಿಧ್ಯದ ಮಹತ್ವವನ್ನು ಸಾರುತ್ತವೆ.
ಪ್ರತಿ ವರ್ಷ ಸೆಪ್ಟೆಂಬರ್ಕೊ ಕೊನೆಯ ಭಾಗದಲ್ಲಿ ಆಗಮಿಸುತ್ತಿದ್ದ ವಿದೇಶಿ ಅತಿಥಿಗಳು ಪ್ರಸಕ್ತ ವರ್ಷ ನವೆಂಬರ್ ಎರಡನೇ ವಾರದಲ್ಲಿ ಕಾಣಿಸಿಕೊಂಡಿಲ್ಕ.ಸ್ಥಳೀಯ ಪಕ್ಷಿಗಳು ಬೆರಳೆಣಿಕೆಯಷ್ಟು ಕಾಣಿಸುತ್ತಿವೆ. ವಲಸೆ ಪಕ್ವಿಗಳ ವಲಸೆಯ ಸಮಯ ಮತ್ತು ಸಂಖ್ಯೆಯಲ್ಲಿ ಬದಲಾವಣೆ ಕಂಡುಬಂದರೆ ಅದು ಪರಿಸರ ಅಧ್ಯಯನದ ದೃಷ್ಟಿಯಿಂದ ಮಹತ್ವದ ಸಂಗತಿಯಾಗಿದೆ. ಹವಾಮಾನ ಬದಲಾವಣೆ, ಜಲಮೂಲಗಳ ಸ್ಥಿತಿ, ಆಹಾರದ ಲಭ್ಯತೆ ಹಾಗೂ ಮಾನವ ಹಸ್ತಕ್ಷೇಪಗಳು ಇವುಗಳ ವಾಸಸ್ಥಾನದ ಮೇಲೆ ಯಾವ ರೀತಿಯ ಪರಿಣಾಮ ಬೀರುತ್ತಿವೆ ಎಂಬುದನ್ನು ಅಧ್ಯಯನ ಮಾಡಬೇಕಿದೆ.
ಒಂದು ಕಾಲದಲ್ಲಿ ಪಕ್ಷಿಗಳ ಕಲರವದಿಂದ ಕಂಗೊಳಿಸುತ್ತಿದ್ದ ಹೆಗ್ಗೆರೆ ಕೆರೆಯಲ್ಲಿ ವಲಸೆ ಹಕ್ಕಿಗಳ ಆಗಮನ ಕಡಿಮೆಯಾಗುತ್ತಿದ್ದರೆ ಅದು ಕೇವಲ ಪಕ್ಷಿಪ್ರೇಮಿಗಳ ಬೇಸರದ ಸಂಗತಿಯಲ್ಲ; ಪರಿಸರ ವ್ಯವಸ್ಥೆಯಲ್ಲಿನ ಬದಲಾವಣೆಯ ಮುನ್ಸೂಚನೆಯೂ ಆಗಿರಬಹುದು.
ಸಾಹಿತಿ/ಪತ್ರಕರ್ತ ಹಾಗೂ ವನ್ಯಜೀವಿ ಛಾಯಾಗ್ರಾಹಕ: ಮಾಲತೇಶ ಅಂಗೂರ, ಹಾವೇರಿ.
