ಶಿಗ್ಗಾಂವಿ ಬಳಿ ಭೀಕರ ಅಪಘಾತ, ನಾಲ್ವರ ದುರ್ಮರಣ
ಹಾವೇರಿ: ಶಿಗ್ಗಾಂವಿ-ಸವಣೂರು ರಾಜ್ಯಹೆದ್ದಾರಿಯಲ್ಲಿನ ಹನುಮರಹಳ್ಳಿಯ ಬಳಿ ಜು.೧೩ರ ಶನಿವಾರ ಬೆಳಿಗ್ಗೆ ೭-೩೦ಕ್ಕೆ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ನಾಲ್ವರು ಮೃತಪಟ್ಟಿರುವ ದುರ್ಘಟನೆ ನಡೆದಿದೆ. ಮುಂದೆ ಇದ್ದ ವಾಹನ ಓವರ್ ಟೇಕ್ ಮಾಡಲು ಹೋಗಿ ಚಾಲಕನ ನಿಯಂತ್ರಣ ಕಳೆದುಕೊಂಡು ಕಾರು ರಸ್ತೆ ಸಮೀಪವಿದ್ದ ಮರಕ್ಕೆ ಡಿಕ್ಕಿ ಹೊಡೆದು ಅಪಘಾತ ಸಂಭವಿಸಿರುವುದಾಗಿ ವರದಿಯಾಗಿದೆ.
ಈ ಅಪಘಾತದಲ್ಲಿ ಮೃತಪಟ್ಟವರನ್ನು ಸವಣೂರು ತಾಲೂಕಿನ ಬೇವಿನಹಳ್ಳಿ ಗ್ರಾಮದ ನಿವಾಸಿಗಳಾದ ನೀಲಪ್ಪ ಮೂಲಿಮನಿ(೨೩), ಸುದೀಪ್ ಕೋಟಿ (೧೮), ಶಿವನಗೌಡ ಯಲ್ಲನಗೌಡ್ರ (೨೦) ಮತ್ತು ಕಲ್ಮೇಶ ಮಾನೋಜಿ (೨೬) ತಿಳಿದು ಬಂದಿದೆ. ಈ ಅಪಘಾಥದಲ್ಲಿ ಇಬ್ಬರು ಸ್ಥಳದಲ್ಲಿಯೇ ಮರಣಹೊಂದಿದ್ದು, ಇದರಲ್ಲಿ ತೀವ್ರವಾಗಿ ಗಾಯಗೊಂಡು ಇಬ್ಬರನ್ನು ಹೆಚ್ಚಿನ ಚಿಕಿತ್ಸೆಗೆ ಹುಬ್ಬಳ್ಳಿಯ ಕಿಮ್ಸಗೆ ದಾಖಲಿಸಲಾಗಿತ್ತು. ಚಿಕಿತ್ಸೆ ಫಲಕಾರಿಯಾಗದೇ ಇಬ್ಬರು ಮೃತಪಟ್ಟಿದ್ದಾರೆ. ಉಳಿದ ಮೂವರು ಘಾಯಾಳುಗಳು ಹುಬ್ಬಳ್ಳಿ ಕಿಮ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ
ಬೆಳಗಾವಿ ಜಿಲ್ಲೆಯ ನಂದಗಡದಲ್ಲಿರುವ ಸಂಗೋಳ್ಳಿ ರಾಯಣ್ಣ ಜನ್ಮ ಸ್ಥಳದ ವೀಕ್ಷಣೆಯ ಪ್ರವಾಸಕ್ಕೆ ಶನಿವಾರ ಬೆಳಿಗ್ಗೆ ೦೬.೩೦ಕ್ಕೆ ಬೇವಿನಹಳ್ಳಿ ಗ್ರಾಮದಿಂದ ೬ಜನರಿದ್ದ ಯುವಕರ ತಂಡವು ಸ್ವಿಪ್ಟ್ ಕಾರನ್ನು ಬಾಡಿಗೆಗೆ ಪಡೆದುಕೊಂಡು ಚಾಲಕ ಕಲ್ಮೇಶ ಮಾನೋಜನೊಂದಿಗೆ ಹೊರಟಿತ್ತು. ೦೭.೩೦ರ ಸುಮಾರಿಗೆ ಸವಣೂರಿಂದ-ಶಿಗ್ಗಾವಿ ಹೋಗುವ ರಾಜ್ಯ ಹೆದ್ದಾರಿ ರಸ್ತೆಯ ಹಸುಮರಳ್ಳಿ ಗ್ರಾಮದ ಹತ್ತಿರ ಚಾಲಕ ಕಲ್ಮೇಶ ಅತೀ ವೇಗ ಮತ್ತು ನಿಷ್ಕಾಳಜಿತನದಿಂದ ಕಾರು ಚಾಲನೆ ಮಾಡಿಕೊಂಡು ಕಾರ ಮುಂದುಗಡೆ ಹೊಗುತ್ತಿದ ವಾಹನವನ್ನು ಓವರ್ ಟೇಕ್ ಮಾಡಲು ಹೋಗಿ ಕಾರಿನ ನಿಯಂತ್ರಣ ತಪ್ಪಿ ರಸ್ತೆ ಬಲಭಾಗದಲ್ಲಿ ಇರುವ ಬೃಹತ್ ಆಕಾರದ ಬೇವಿನ ಮರಕ್ಕೆ ಡಿಕ್ಕಿ ಹೊಡೆದಿದ್ದಾನೆ.
ಅಪಘಾತದ ಘಾಯಾಳುಗಳುಗಾಳಾದ ಸಚಿನ್ ಎಮ್ಮಿ ೨೧ ವರ್ಷ, ನಾಗರಾಜ ಎಮ್ಮಿ ೨೫ ವರ್ಷ, ವಿನಾಯಕ ನಾಗನೂರು ೨೦ ವರ್ಷ ಇವರು ಕಿಮ್ಸ್‌ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅಪಘಾತ ನಡೆದ ಸ್ಥಳಕ್ಕೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಂಶು ಕುಮಾರ ಹಾಗೂ ಎ.ಎಸ್.ಪಿ. ಸಿ.ಗೋಪಾಲ್ ಅವರು ಸ್ಥಳಕ್ಕೆ ಬೇಟಿ ನೀಡಿ ಪರಿಶೀಲನೆ ನಡೆಸಿ ತನಿಖಾಧಿಕಾರಿಗಳಿಗೆ ಸೂಕ್ತ ಮಾರ್ಗದರ್ಶನ ನೀಡಿರುತ್ತಾರೆ. ಈಬಗ್ಗೆ ಶಿಗ್ಗಾವಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
