ಶಿಗ್ಗಾಂವ ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆಗೆ ಶೇ.80.48ರಷ್ಟು ಮತದಾನ: ಡಾ.ವಿಜಯಮಹಾಂತೇಶ ದಾನಮ್ಮನವರ
ಹಾವೇರಿ : ಶಿಗ್ಗಾಂವ ವಿಧಾನಸಭಾ ಕ್ಷೇತ್ರಕ್ಕೆ ನವೆಂಬರ್ 13ರಂದು ನಡೆದ ಉಪ ಚುನಾವಣೆಯಲ್ಲಿ ಶೇ.80.48ರಷ್ಟು ಮತದಾನದ ಪ್ರಮಾಣ ದಾಖಲಾಗಿದೆ ಎಂದು ಜಿಲ್ಲಾ ಚುನಾವಣಾಧಿಕಾರಿಗಳು ಆಗಿರುವ ಜಿಲ್ಲಾಧಿಕಾರಿಗಳಾದ ಡಾ.ವಿಜಯಮಹಾಂತೇಶ ದಾನಮ್ಮನವರ ಅವರು ತಿಳಿಸಿದ್ದಾರೆ.
ಬೆಳಗ್ಗೆ 7 ಗಂಟೆಗೆ ಆರಂಭಗೊಂಡ ಮತದಾನ ಪ್ರಕ್ರಿಯೆ ಸಂಜೆವರೆಗೆ ಸುವ್ಯವಸ್ಥಿತವಾಗಿ ನಡೆಯಿತು. ಯಾವುದೇ ಅಹಿತಕರ ಘಟನೆಗಳು ದಾಖಲಾಗಿರುವುದಿಲ್ಲ. ಎಲ್ಲಾ 241 ಮತಗಟ್ಟೆಗಳಲ್ಲಿ ಅಗತ್ಯ ಭದ್ರತೆ ಒದಗಿಸಲಾಗಿತ್ತು. ಕುಡಿಯುವ ನೀರು, ವೈದ್ಯಕೀಯ ಚಿಕಿತ್ಸೆಗೆ ಏರ್ಪಾಡು ಮಾಡಲಾಗಿತ್ತು.
ಬೆಳಗ್ಗೆ 7 ಗಂಟೆಯಿಂದ 9 ಗಂಟೆವರೆಗೆ ಶೇ.10.08ರಷ್ಟು, 11 ಗಂಟೆವರೆಗೆ ಶೇ.26.01ರಷ್ಟು, ಮಧ್ಯಾಹ್ನ 1 ಗಂಟೆವರೆಗೆ ಶೇ.43.50ರಷ್ಟು, ಮಧ್ಯಾಹ್ನ 3 ಗಂಟೆವರೆಗೆ ಶೇ.59.62ರಷ್ಟು, ಸಂಜೆ 5 ಗಂಟೆವರೆಗೆ 75.07ರಷ್ಟು ಹಾಗೂ ಮತದಾನ ಅವಧಿ ಮುಕ್ತಾಯನಂತರ ಅಂತಿಮವಾಗಿ ಶೇ.80.48ರಷ್ಟು ಮತದಾನದ ಪ್ರಮಾಣ ದಾಖಲಾಗಿದೆ.
*ಮತದಾನದ ವಿವರ*: ಒಟ್ಟು 1,21,443 ಪುರುಷರು, 1,16,076 ಮಹಿಳೆಯರು ಹಾಗೂ ಇತರೆ 6 ಸೇರಿ ಒಟ್ಟು 2,37,525 ಮತದಾರರ ಪೈಕಿ ಬೆಳಿಗ್ಗೆ 7 ಗಂಟೆಯಿಂದ 9 ಗಂಟೆವರೆಗೆ 13,074 ಪುರುಷರು ಹಾಗೂ 10,877 ಮಹಿಳೆಯರಿಂದ ಶೇ.10.08ರಷ್ಟು ಮತದಾನವಾಗಿದೆ. ಬೆಳಗಿನ 11 ಗಂಟೆವರೆಗೆ 32,315 ಪುರುಷರು ಹಾಗೂ 29,461 ಮಹಿಳೆಯರಿಂದ ಶೇ.26.01ರಷ್ಟು ಮತದಾನವಾಗಿದೆ. ಮಧ್ಯಾಹ್ನ 1 ಗಂಟೆವರೆಗೆ 51,483 ಪುರುಷರು ಹಾಗೂ 51,838 ಮಹಿಳೆಯರಿಂದ ಶೇ.43.50ರಷ್ಟು ಮತದಾನವಾಗಿದೆ. ಮಧ್ಯಾಹ್ನ 3 ಗಂಟೆವರೆಗೆ 69,750 ಪುರುಷರು ಹಾಗೂ 71,856 ಮಹಿಳೆಯರು ಇತರೆ ಓರ್ವ ಸೇರಿ 1,41,607 ಜನರಿಂದ ಶೇ.59.62ರಷ್ಟು ಮತದಾನವಾಗಿದೆ. ಸಂಜೆ 5 ಗಂಟೆವರೆಗೆ 89,737 ಪುರುಷರು ಹಾಗೂ 88,582 ಮಹಿಳೆಯರು ಮತ್ತು ಇತರೆ ಇಬ್ಬರು ಸೇರಿ 1,78,321 ಜನರಿಂದ ಶೇ.75.07ರಷ್ಟು ಮತದಾನವಾಗಿದೆ. ಅಂತಿಮವಾಗಿ ಮತದಾನ ಅವಧಿ ಮುಕ್ತಾಯದ ಬಳಿಕ 98,642 ಪುರುಷರು ಹಾಗೂ 92,522 ಮಹಿಳೆಯರು ಮತ್ತು ಇತರೆ 2 ಸೇರಿ ಒಟ್ಟು 1,91,166 ಜನರು ಮತಹಕ್ಕನ್ನು ಚಲಾಯಿಸಿ ಶೇ.80.48ರಷ್ಟು ಮತದಾನದ ಪ್ರಮಾಣ ದಾಖಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
*ಅಗತ್ಯ ಭದ್ರತೆ:* ಮತದಾನದ ಬಳಿಕ ಮತಯಂತ್ರಗಳ ಸಾಗಣೆಯನ್ನು ಸೂಕ್ತ ಪೊಲೀಸ್ ಬಂದೋಬಸ್ತ್ ಯೋಜನೆ ರೂಪಿಸಿ ಕೈಗೊಳ್ಳಲಾಗಿದೆ. ಮತ ಎಣಿಕೆ ಕೇಂದ್ರವಾದ ದೇವಗಿರಿಯ ಸರ್ಕಾರಿ ಎಂಜಿನಿಯರಿಂಗ್ ಕಾಲೇಜಿನ ಭದ್ರತಾ ಕೊಠಡಿಯಲ್ಲಿ ಎಲ್ಲಾ ಅಗತ್ಯ ಮುನ್ನೆಚ್ಚರಿಕೆಗಳೊಂದಿಗೆ ಭದ್ರತೆಯಿಂದ ಮತಯಂತ್ರಗಳನ್ನು ಇಡಲು ವ್ಯವಸ್ಥೆ ಮಾಡಲಾಗಿದೆ ಎಂದು ಜಿಲ್ಲಾಧಿಕಾರಿಗಳು ತಿಳಿಸಿದ್ದಾರೆ.
*ನವೆಂಬರ್ 23ಕ್ಕೆ ಮತ ಎಣಿಕೆ:* ಈ ಉಪ ಚುನಾವಣೆಯ ಮತ ಎಣಿಕೆ ಪ್ರಕ್ರಿಯೆಯು ನವೆಂಬರ್ 23ರಂದು ದೇವಗಿರಿಯ ಸರ್ಕಾರಿ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಬೆಳಗ್ಗೆ 8 ಗಂಟೆಯಿಂದ ಆರಂಭವಾಗಲಿದೆ ಎಂದು ಜಿಲ್ಲಾಧಿಕಾರಿಗಳು ತಿಳಿಸಿದ್ದಾರೆ.
